1Cor 3 | WSK | STEP | Bare aga singsang, tom ani nengerak munakakasam bare nina ali imi ko kariimet iwita nengerak munakakasam. Ani nina Korang Bur karogo iwita nengerak me munakakasam. Mu awuk, nina Kristus ko munan te kuriang gotektek iwita bagakasan.

1 Corinthians 3

Corinth Kris alo nunumi pagaru motam kirker awukasan

1 Bare aga singsang, tom ani nengerak munakakasam bare nina ali imi ko kariimet iwita nengerak munakakasam. Ani nina Korang Bur karogo iwita nengerak me munakakasam. Mu awuk, nina Kristus ko munan te kuriang gotektek iwita bagakasan. 2 Se ani nina kuriang barare iwita amin ningarukasam, ale na aora me ningarukasam, mu awuk, nina na aora nalko me terong. Ale aitak betelatala nalko me terong mam. 3 Nina yam ali imi ko kariimet iwita bagasan. Nenenga ningi mu nengemang magara, se singi kager ko munan mu am aniso, se umutang ali imi ko munan nina betesan. 4 Mu awuk, ninga ningi bo balso, “Ani Paul ko”, se bo balso, “Ani Apollos ko”, mu nina ali imi ko kariimet iwita bagasan.

5 Se Apollos mu anape? Se Paul mu anape? Mu ana ura kari la! Ana Kaem ura kirker nangaram, se ura umutang te nina Kristus ko nengemang ningi nunguning aram. 6 Ani tam muguri aguwem, se Apollos yu tuam, bare Kaem sokel tuam se tarigiram. 7 Se awiriya tam muguri aguso, se awiriya yu tuso, mu nuna mel yam. Bare Kaem sokel tuso se tarigiso, se umu te Kaem nup biya taso. 8 Kari tam muguri aguso, se kari yu tuso, mu nunga ikia koma suwanta. Se nuna ilagala nunga ura iluman mu ko koma nomoke nomoke tamonko. 9 Mu awuk, ana ilagala Kaem ko ura kari bagasan. Se nina mu Kaem ko ningam iwita bagasan.

Kaem ko ura kari mu kawam kaola ko kari iwitata

Ale nina Kaem ko kawam iwitata. ^{▼▼1 Cor 3:9-17 Kris kariimet mu Kaem ko kawam iwita: Eph 2:20-22.} 10 Kaem gomang aisam ale ikia sokel aisam mu te ani kawam kaola ko kari gira yawara ko aratem, ale ngatalek warem. Se kari bo ngatalek umutang awete kawam kalowoso. Bare suwan suwan kawam kalo gilingisan umu ko ninguru sinar tamonko. 11 Mu nina ikisan, kawam ko ngatalek nunguningkiri mu Jesus Kristus, maingkala bangorman. Se kari bo ta ngatalek bo kigilik mu bangokko me terong. 12 Saki mu silver, gold, se manga aora aora, ko koma kalel biya, umu te kawam kalomonko. Saki mu tam kuting, sua, sirsir te kawam kalomonko. 13 Se kari suwan suwan nunga ura beteman, mu Kristus peleruk tairukko tom te asele wetang te aratukko. Tom mu te tama ago aratukko. Se tama mu te nunga ura beteman umutang ura ningo agi memek agi mu aringinak, ko ikinakko. 14 Kari kawam ninguru kaolam se tama me kaniruk, mu ko koma yawara taukko. 15 Bare kari ko kawam kani sapuruk, mu kari mu ko ura suen biya dagu sapurukko. Se ura kari mu kota ningo nuam bagurukko, bare nu tama ningi wore aratam iwita.

16 Nina mu Kaem ko kawam kako nunguning, se ko Korang Bur ninga ningi bagoso. Bare nina mel mu ko me ikisan e? 17 Awiriya Kaem ko kawam kako mu maguwurok, mu Kaem nu bita maguwurokko. Mu awuk, Kaem ko kawam mu laili biya, se nina mu kawam borta.

Ana kari nunup me patowanakko

18 Nengeta ninimi me kulalko! Awiriya numi ikiok nu ali imi te nu kari ikia biya ko numi baluk, mu nu ko ikia biya umutang buring ko bitiruk ale Kristus bowa ningi namuruk mu asele nu kari ikia nunguningkiri mu ko aratukko. Se ali imi ko kariimet nu aringimon ale kari ngualara ko balmon, bare nu kari ikia nunguning karogo. 19 Mu awuk, Kaem koma te ali imi ko ikia mu ngualara. Se Kaem ko batoga te den bo iwita aniso: “Kaem kari ikia bibiya ago mu nunga ikia umutang te nunga guruguso se dagulasan.” ^{▼▼1 Cor 3:19-20 Job 5:13; Psalm 94:11.} 20 Se aking Kaem ko batoga te den bo tala iwita aniso: “Kari Biya ikia kari bibiya nunga ikia mu arigiso mu mel yam iwita.”

21 Butata se, kari nunup me patowaralko! Mel suen biya mu nenenga la: 22 Paul Apollos se Peter, se ali imi, se kuera se marak, se aitakta ko mel se tom udagi ko mel - mel suen la imi nenenga, 23 se nina Kristus ko, se Kristus mu Kaem ko. ^{▼▼1 Cor 3:21-23 Kaem mel suen biya Kris alo nungaram: Psa 84:11; Rom 8:28-32; 1 Cor 2:9.}